'ഒരു കുട പോലും മടക്കാന്‍ കഴിയാത്ത അമേരിക്കന്‍ പ്രസിഡന്റോ'? ട്രംപിനെതിരെ ട്രോള്‍മഴ: വീഡിയോ

അമേരിക്കന്‍ പ്രസിഡന്റായ ഡൊണാള്‍ഡ് ട്രംപിന് കുട എന്നും ഒരു വയ്യാവേലിയാണ്. അദ്ദേഹത്തിന് കുട അടയ്ക്കാന്‍ സാധിക്കാത്ത പല സാഹചര്യങ്ങളുടെ വീഡിയോകള്‍ സോഷ്യല്‍ മീഡിയയില്‍ വൈറലാണ്. ഇപ്പോഴിതാ അത്തരത്തിലൊരു വീഡിയോ വീണ്ടും സോഷ്യല്‍ മീഡിയയില്‍ വൈറലാവുകയാണ്. ഹമാസും ഇസ്രായേലും തമ്മിലുള്ള സംഘര്‍ഷത്തില്‍ മധ്യസ്ഥ വഹിക്കാന്‍ മിഡില്‍ ഈസ്റ്റിലേക്കുള്ള യാത്രയ്ക്ക് തയ്യാറെടുക്കുന്നതിനിടയിലാണ് സംഭവം.

മഴയുള്ളതിനാല്‍ കാറില്‍ നിന്ന് കുടയും പിടിച്ചാണ് വിമാനത്തിലേക്ക് നടന്നത്. വിമാനത്തിനുള്ളിലേക്ക് കയറാന്‍ തുടങ്ങിയപ്പോള്‍ കുട അടയ്ക്കാന്‍ പാടുപെടുകയും പെട്ടെന്ന് തന്നെ ഒരു സഹായി വന്ന് കുട അടയ്ക്കുന്നതുമാണ് ദൃശ്യങ്ങളില്‍ കാണാന്‍ സാധിക്കുന്നത്. എല്ലാം വളരെ പെട്ടെന്നാണ് സംഭവിച്ചതെങ്കിലും വീഡിയോ വളരെ വേഗം തന്നെ സോഷ്യല്‍ മീഡിയയില്‍ പ്രചരിക്കുകയായിരുന്നു. 'ട്രംപിന് സ്വന്തം കുട അടയ്ക്കാന്‍ കഴിയില്ല. നമ്മുടെ രാജ്യത്തിന് നാണക്കേട്' എന്ന അടിക്കുറിപ്പോടെ ഒരു ഉപയോക്താവാണ് എക്‌സില്‍ പോസ്റ്റ് പങ്കിട്ടത്.

ഒട്ടേറെപ്പേരാണ് പോസ്റ്റിന് താഴെ കമന്റുമായി എത്തിയിരിക്കുന്നത്. 'പ്രായമാകുമ്പോള്‍ ചില കാര്യങ്ങള്‍ കൂടുതല്‍ വെല്ലുവിളി നിറഞ്ഞതാണ്' എന്നായിരുന്നു ഒരാളുടെ കമന്റ്. കുട അടച്ചില്ലെങ്കിലും ലോകത്തിന് സമാധാനം ഉണ്ടാക്കാന്‍ അദ്ദേഹത്തിന് സാധിക്കുമെന്നായിരുന്നു മറ്റൊരാളുടെ കമന്റ്. അദ്ദേഹത്തോട് ഈ കാര്യം ചോദിച്ചാല്‍ തന്റെ അത്ര കുടകളെ കുറിച്ച് അറിയുന്ന മറ്റൊരാള്‍ ഉണ്ടാകില്ലെന്നായിരിക്കും അയാളുടെ മറുപടി എന്നാണ് മറ്റൊരാള്‍ കുറിച്ചത്.

ഇതിനു മുന്‍പും സമാനമായ സാഹചര്യം ട്രംപ് നേരിടേണ്ടി വന്നിട്ടുണ്ട്. 2018 ഒക്ടോബറിലായിരുന്നു ഒരു സംഭവം. മഴയുള്ള ഒരു ദിവസം എയര്‍ഫോഴ്സ് വണ്ണിലേക്ക് കയറുമ്പോള്‍ കുട ശരിയായി അടയ്ക്കാന്‍ അദ്ദേഹം പാടുപെടുകയും പിന്നീട് ഒരു ജീവനക്കാരന്‍ വന്ന് അടയ്ക്കുന്നതിന്റെയും വീഡിയോ പ്രചരിച്ചിരുന്നു. 2025 ഏപ്രിലില്‍ മാര്‍-എ-ലാഗോയിലേക്ക് പുറപ്പെടാന്‍ ട്രംപ് തയ്യാറെടുക്കുമ്പോള്‍ വിമാനത്തിന്റെ ഇടുങ്ങിയ വാതിലിലൂടെ കുട അടയ്ക്കാന്‍ ശ്രമിച്ച് പരാജയപ്പെടുന്ന മറ്റൊരു വീഡിയയോും സോഷ്യല്‍ മീഡിയയില്‍ വൈറലായിരുന്നു.

Content Highlights: trump struggles with umbrella